Smaidi, smaideņ,
Leiksmoj, leiksmeņ,
Prīcojīs, muns
Lobais prīceņ!
(O. Slišāns)
Dzymtuos volūdys dīna piec UNESCO aicynuojuma iz vysa pasauļa teik atzeimāta jau 23 godus. Tai veļteitū pasuokumu mierkis ir pīvērst viereibu volūdu i kulturu daudzveideibai i sekmēt dzymtuos volūdys lītuošonu, kai ari vairuot apziņu, ka dzymtuo volūda ir pamats dzilis i daudzpuseigys personeibys atteisteibai.
Itūgod, atzeimejūt Starptautiskū dzymtuos volūdys dīnu, latgalīšu rokstu volūdys puļceņa dalinīki - 2.a i 11.klasis školāni- raudzieja runuot, lasiet i spieļuotīs latgalīšu volūdā.
Ūtrklasnīki deklamēja Ontona Slišāna dzejūli “Kūpā”, tod beja īspieja sovys zynuošanys i prasmis latgalīšu volūdā puorbaudeit kahoot viktorīnā “Zyni vai mini!” Bet kaitys “Restorans” un “Capurnīks soka” izsauce daudzi smīklu i prīcys.
Latgalīšu rokstu volūdys puļceņu nūdarbeibys teik organizietys Latgalīšu volūdys, literaturys un kulturviesturis školuotoju asociacejys nodybynuojuma realizietuo projekta “Mērķziedojums-pilotprojekts “Latgaliešu valodas apguve izglītības iestādēs Latgalē”” (Nr.2021-1-ZIE006) ītvarūs. Projekts teik realizēts ar Valsts kultūrkapitāla fonda atbolstu nu “Latvijas valsts meži” mierķzīduojuma.
Latgalīšu rokstu volūdys pulceņa školuotuojis Ineta Misāne un Laila Budreviča
